Mae plant Cymru ar fin teimlo pŵer llawn chwarae – gyda lansiad rhwydwaith Llyfrgelloedd Teganau Mudiad Meithrin – menter arloesol sy’n cael ei chefnogi gan Menter Môn i roi teganau o safon (fyddai fel arall yn debyg o gyrraedd safleoedd tirlenwi) a theganau Cymraeg i ddwylo plant ledled y wlad – naill ai am ddim neu am gost o £1.
Ar 28 Mai, Diwrnod Rhyngwladol Chwarae’r Byd (sy’n dathlu lansiad y llyfrgell deganau gyntaf erioed), mae Mudiad Meithrin yn gwybod bod chwarae yn hanfodol ar gyfer datblygiad plentyndod, ond mae llawer o deuluoedd yn cael trafferth fforddio’r teganau addysgol a dychmygus diweddaraf.
Mae menter ddiweddaraf Mudiad Meithrin – Llyfrgell Deganau Dewin a Doti (wedi’i ysbrydoli gan gymeriadau hoffus y Mudiad) – yn camu i mewn i bontio’r bwlch hwnnw drwy greu system fenthyca sy’n caniatáu i deuluoedd fenthyg teganau o’u Cylchoedd Meithrin yn union fel y byddent yn benthyg llyfrau o lyfrgell.
“Credwn yn Mudiad Meithrin y dylai chwarae fod yn hawl, nid yn fraint,” meddai Dr Gwenllian Lansdown Davies, Prif Weithredwr Mudiad Meithrin. “Ein cenhadaeth yw sicrhau bod gan bob plentyn, waeth beth fo’u cefndir, fynediad at deganau sy’n ysbrydoli creadigrwydd, dysgu iaith, a hwyl.”
Gyda llyfrgelloedd benthyca teganau yn ymddangos mewn cymunedau ledled y wlad, gall teuluoedd nawr fenthyg amrywiaeth o deganau am ddim neu am gost o £1. Mae’r fenter – a ariennir yn rhannol gan Menter Môn trwy gynllun sy’n hybu’r economi gylchol ‘Cylchol’ ac wedi’i hysbrydoli gan ymgyrch diweddar Cyfeillion y Ddaear – hefyd wedi’i chynllunio gyda chynaliadwyedd mewn golwg, gan leihau gwastraff teganau wrth hyrwyddo rhannu a chyfrifoldeb cymdeithasol ar yr un pryd.
Mae Mudiad Meithrin yn galw ar wneuthurwyr teganau, rhoddwyr teganau, a gwerthwyr teganau i gefnogi’r fenter hon gan wneud chwarae’n hygyrch i bob plentyn, gan dynnu sylw at bris uchel teganau, yn enwedig teganau Cymraeg.
*Bydd y llyfrgell deganau yn cael ei lansio mewn 17 lleoliad ar draws 4 sir ond bydd yr holl leoliadau gofal plant, blynyddoedd cynnar a chwarae sy’n gysylltiedig â Mudiad Meithrin hefyd yn gallu gwneud defnydd llawn o “Becyn Llyfrgell Deganau” i hwyluso eu sefydlu.
**Mae Diwrnod Chwarae’r Byd yn cael ei ddathlu’n rhyngwladol ar 28 Mai bob blwyddyn. Mae’r diwrnod hwn yn coffáu’r diwrnod ym 1987 pan sefydlwyd y Gymdeithas Ryngwladol Llyfrgelloedd Teganau (ITLA) gyntaf.
