Gwobrau Mudiad Meithrin

Cylch Meithrin Cymru – Noddwyd gan Boom Cymru

Enillydd: Cylch Meithrin Y Gurnos, Merthyr Tudful 

Gwirfoddoli – Noddwyd gan Wootzoo

Enillydd: Ben Davies, Ffrindiau Bach Tegryn

Mae’r unigolyn sy’n ennill y wobr yma yn enghraifft wych o berson sy’n gwneud
gwahaniaeth enfawr y tu ôl i’r llenni. Yn dawel ac yn ddiymhongar, mae nhw bob
amser yn barod i roi ei amser a’i sgiliau i helpu.
Boed hynny drwy wneud gwaith cynnal a chadw, adeiladu adnoddau neu ddatrys
problemau ymarferol, mae cyfraniad yr unigolyn yma wedi arbed amser ac arian
sylweddol i’r lleoliad. Yr hyn sy’n sefyll allan fwyaf yw ei ostyngeiddrwydd a’i
barodrwydd i roi’r clod i eraill.

Yn derbyn canmoliaeth uchel mae Gwawr Evans Cylch Meithrin
Pontrhydfendigaid a Lesley Rowlands Cylch Meithrin Waunfawr.

Cylch i Bawb – Noddwyd gan Ateb

Enillydd: Cylch Meithrin Machynlleth, Powys

Mae’r Cylch Meithrin sy’n dod i’r brig eleni yn dangos ymrwymiad i gynhwysiant yn
amlwg ym mhob agwedd o’r ddarpariaeth. Mae’r ffordd y mae’r dysgu o DARPL
wedi’i blethu i’w harferion dyddiol yn sicrhau bod pob plentyn yn teimlo ei fod yn
perthyn ac yn cael y cyfle i gymryd rhan yn llawn.
Mae’r lleoliad yn dangos yn glir sut y gall chwarae a dysgu cynhwysol drawsnewid
bywydau plant a theuluoedd, gan greu cyfleoedd i bawb ffynnu gyda’i gilydd.

Yn derbyn canmoliaeth uchel mae Ffrindiau Bach yr Eos a Chylch Meithrin Y
Gurnos.

Siaradwr Cymraeg Newydd – noddwyd gan Gyngor Sir Ceredigion

Enillydd: Dani Abrantes, Cylch Meithrin Y Graig, Sir Ddinbych.

Roedd y panel dyfarnu wedi eu hysbrydoli gan stori’r dair sydd wedi cyrraedd y brig yn y
categori yma eleni – roedd yr enwebiadau’n rhai cryf iawn.
Mae taith yr unigolyn arbennig yma fel siaradwr Cymraeg newydd yn un ysbrydoledig iawn.
Ers dechrau dysgu Cymraeg yn 2023, mae wedi ymrwymo’n llwyr i ddatblygu ei sgiliau a
magu ei hyder.
Mae’n arbennig o drawiadol ei bod bellach yn arwain sesiynau amser mat ac amser byrbryd
drwy gyfrwng y Gymraeg. Trwy fanteisio ar gyrsiau Camau a’r gefnogaeth a gafodd gan
Croesi’r Bont, mae wedi gwneud cynnydd arbennig ac yn chwarae rhan bwysig wrth greu
amgylchedd Cymraeg naturiol a chynhwysol i’r plant.

Yn derbyn canmoliaeth uchel mae Chloe Hughes o Gylch Meithrin Bro Alun,
Wrecsam a Maxine Read o Gylch Meithrin Glanrafon, Sir y Fflint.

Ardal Chwarae a Dysgu Tu Allan – Noddwyd gan Blagur Coed

Enillydd: Cylch Meithrin Y Gorlan Fach, Tremadog, Gwynedd 

Mae’r ymrwymiad i chwarae a dysgu yn yr awyr agored yn y cylch yma yn
wirioneddol ysbrydoledig. Mae’r cysylltiadau cryf â’r gymuned a’r defnydd dychmygus
o’r rhandir a’r ardal ysgol goedwig yn darparu cyfleoedd dysgu gwerthfawr drwy
gydol y flwyddyn.
Roedd yn arbennig o drawiadol gweld sut mae’r lleoliad wedi codi arian i sicrhau bod
staff a phlant yn gallu mwynhau’r awyr agored ym mhob tywydd. Mae’r ddarpariaeth
mor amlbwrpas, hygyrch a chroesawgar fel ei bod yn hawdd gweld pam ei bod wedi
ysbrydoli cymaint o bobl.

Yn derbyn canmoliaeth uchel mae Cylch Meithrin Bro Alun, a Chylch Meithrin
Rhaeadr.

Cynorthwy-ydd – Noddwyd gan Sbarduno

Enillydd: Eryn Roberts – Cylch Meithrin Bro Alun, Wrecsam

Dyma gategori cryf gyda phob un o’r rhestr fer yn dangos eu hymrwymiad at y Cylch, eu
parodrwydd i gefnogi’r arweinydd, a’r gallu i gynnal sesiynau gyda’r plant yn ganolog.
Mae hon yn gynorthwyydd arbennig sy’n mynd gam ymhellach bob amser dros y plant yn ei
gofal. Mae ganddi’r gallu i weld cryfderau ac anghenion unigol pob plentyn ac ymateb iddynt
mewn ffordd gynnes a chefnogol.
Mae ei chreadigrwydd, ei hymroddiad a’i pharodrwydd i ddod o hyd i adnoddau a syniadau
newydd yn cyfoethogi profiadau’r plant yn ddyddiol. Mae’n amlwg ei bod yn gwneud
gwahaniaeth parhaol i’r plant a’r teuluoedd y mae’n eu cefnogi.

Yn derbyn canmoliaeth uchel mae Manon Mainwaring o Gylch Meithrin
Pontyberem a Non Crowther o Gylch Meithrin Pont y Gof.

Meithrinfa Ddydd – noddwyd gan Gofalwn Cymru

Enillydd: Meithrinfa Twts Tywi

Mae’r feithrinfa sy’n dod i’r brig yn y categori hwn wedi meithrin cysylltiadau arbennig
o gryf â’i chymuned leol, gan sicrhau bod plant yn datblygu ymdeimlad cryf o berthyn
i’r gymuned o oedran cynnar.
Drwy ymweliadau rheolaidd â’r cartref gofal, y ganolfan arddio, yr orsaf dân, yr
eglwys a’r llyfrgell, mae’r plant yn cael profiadau cyfoethog sy’n ehangu eu
gorwelion. Mae’r cyfathrebu gwych â rhieni yn sicrhau bod teuluoedd yn teimlo’n
rhan o bob cam o daith eu plentyn.

Yn yr derbyn canmoliaeth uchel mae Meithrinfa Cywion Bach a Meithrinfa
Liliwenfach.

Arweinydd – Noddwyd gan W H Ireland

Enillwydd: Myfanwy Harman – Cylch Meithrin Y Gurnos, Merthyr Tudful

Mae stori’r arweinydd yma yn un sy’n dangos angerdd, gweledigaeth a thosturi. O
ddechrau gyda dim ond un plentyn yn 2023, mae hi wedi llwyddo i ddatblygu’r
gwasanaeth yn ddarpariaeth amser llawn ffyniannus sy’n cefnogi 34 o blant ac yn
cyflogi tîm o chwech aelod o staff.
Mae’r enwebiadau yn tystio i’r gofal a’r cymorth y mae’n eu rhoi i’w staff a’i
theuluoedd. Mae ei hymrwymiad i sicrhau bod pob plentyn yn gallu manteisio ar
brofiadau a chyfleoedd, beth bynnag eu hamgylchiadau, yn gwneud ei
harweinyddiaeth yn wirioneddol ysbrydoledig.

Yn derbyn canmoliaeth uchel mae Caryl Mai Edwards o Gylch Meithrin
Machynlleth a Kelly Thompson o Gylch Meithrin Rhaeadr.

Dysgu a Datblygu – Noddwyd gan Portal Training

Enillydd: Cylch Meithrin Machynlleth

Mae’r enillydd yn y categori yma yn dangos ymrwymiad gwirioneddol i ddatblygiad
proffesiynol. Mae’r ffordd y maent yn troi hyfforddiant yn gamau gweithredu ymarferol
yn arbennig o drawiadol.
Drwy gyfarfodydd wythnosol rheolaidd, mae’r tîm yn rhannu gwybodaeth newydd, yn
myfyrio ar eu harferion ac yn cynllunio’r camau nesaf gyda’i gilydd. Mae’n amlwg bod
dysgu parhaus wedi’i wreiddio yn niwylliant y lleoliad ac yn cyfrannu’n uniongyrchol
at ansawdd y gofal a’r addysg a ddarperir.

Yn derbyn canmoliaeth uchel mae Cylch Meithrin Hermon a Cylch Meithrin
Crymych.

Cylch Meithrin Bach

Enillydd: Cylch Meithrin Deri Bach

Dyma gylch sydd yn enghraifft wych o ddarpariaeth sy’n ymddiried yn y plant ac yn
eu hannog i fod yn annibynnol o oedran ifanc. Mae’r plant yn cael cyfleoedd i gymryd
rhan yn eu hasesiadau risg eu hunain, yn ogystal â datblygu sgiliau bywyd
gwerthfawr drwy weithgareddau fel pobi a gwnïo.
Mae’r profiadau creadigol yn yr awyr agored, ynghyd ag ymweliadau gan ŵyn a
merlod, yn creu amgylchedd cyfoethog a chofiadwy lle gall plant ddysgu drwy brofiad
a rhyfeddod.

Yn derbyn canmoliaeth uchel mae Cylch Meithrin Llanbrynmair a Chylch
Meithrin Ysgol Pentrecelyn.

Cylch Ti a Fi – Noddwyd gan Adnodd

Enillydd: Cylch Ti a Fi Llangwyryfon

Mae’r Cylch Ti a Fi yma wedi llwyddo i greu grŵp cynnes, croesawgar a chymunedol
sydd wedi tyfu’n arbennig o gyflym. Mae cael dros 40 o blant ar y gofrestr mewn
ardal wledig yn dystiolaeth o’r gwaith gwych sy’n digwydd yno.
Mae’r amrywiaeth eang o weithgareddau a phrofiadau, ynghyd â’r partneriaethau
cryf â’r ysgol gynradd a sefydliadau lleol, yn sicrhau bod plant a theuluoedd yn
teimlo’n rhan o gymuned fywiog a chefnogol.

Yn derbyn canmoliaeth uchel mae Cylch Ti a Fi Garn Bach Tryweryn a Cylch
Ti a Fi Pentrecelyn.

Cylch Meithrin y De-ddwyrain

Enillydd: Cylch Meithrin Y Gurnos, Merthyr Tudful

Mewn cyfnod cymharol fyr, mae’r Cylch Meithrin yma wedi adeiladu darpariaeth
arbennig sy’n llawn egni, creadigrwydd ac uchelgais gan ddarparu gwasanaeth
Dechrau’n Deg a gofal dydd llawn.
Mae’r ymrwymiad i les plant a staff yn amlwg ym mhob agwedd o’u gwaith, ac mae’r
ffordd y maent yn croesawu rhieni fel rhan o deulu’r Cylch yn wirioneddol galonogol.
Mae eu parodrwydd i arloesi, rhannu syniadau a dysgu’n gyson yn gwneud y lleoliad
hwn yn enghraifft wych o’r hyn sy’n bosibl pan fo gweledigaeth a phenderfyniad yn
cyd-fynd.

Yn derbyn canmoliaeth uchel mae Ysgol Feithrin Pontypŵl a Chylch Meithrin
Evan James ym Mhontypridd.

Cylch Meithrin y De-orllewin –  Noddwyd gan Pugh Computers

Enillydd: Cylch Meithrin Rhaeadr, Powys

Mae’r cylch buddugol yn y categori yma yn cynnig profiadau awyr agored arbennig
sy’n rhoi cyfleoedd gwerthfawr i blant ddysgu, archwilio a ffynnu. O dyfu tomatos eu
hunain i fwynhau bod allan ym mhob math o dywydd, mae’r ddarpariaeth yn meithrin
cariad at natur ac annibyniaeth ymysg y plant.
Roedd yn arbennig o hyfryd gweld sut mae’r moch cwta yn rhan bwysig o fywyd y
cylch, gyda’r plant yn cymryd rhan mewn gweithgareddau codi arian i helpu i ofalu
amdanynt. Mae hyn yn dangos ymdeimlad cryf o gyfrifoldeb, caredigrwydd a
pherchnogaeth ymysg y plant.

Yn derbyn canmoliaeth uchel mae Cylch Meithrin Llangennech – Y Caban a
Chylch Meithrin Saron a’r Hendre.

Cylch Meithrin y Gogledd-orllewin –  Noddiwyd gan Gwasg Carreg Gwalch

Enillydd: Cylch Meithrin Y Gorlan Fach, Tremadog

Dyma lleoliad sy’n llawn creadigrwydd ac ysbryd cymunedol. Mae annibyniaeth y
plant wrth galon y ddarpariaeth, tra bod y llwyddiant wrth sicrhau grantiau a
chefnogaeth ariannol yn dangos ymroddiad ac ymrwymiad y tîm i greu’r cyfleoedd
gorau posibl. Mae’r defnydd o’r ardd gymunedol ar gyfer tyfu llysiau yn enghraifft
arall o’u gallu i wneud y gorau o’r gymuned leol er budd y plant.
Mae’r profiadau a’r syniadau y mae’r arweinydd wedi’u dwyn yn ôl o Dde Affrica wedi
ychwanegu dimensiwn unigryw at ddysgu’r plant ac wedi cyfoethogi eu dealltwriaeth
o’r byd o’u cwmpas.

Yn derbyn canmoliaeth uchel mae Cylch Meithrin Porthmadog a Chylch
Meithrin Pwllheli.

Cylch Meithrin y Gogledd-ddwyrain a’r Canolbarth

Yr Enillydd: Cylch Meithrin Machynlleth

Dyma gylch sy’n dangos yn glir sut y gall lleoliad fod yn rhan weithredol o’i gymuned.
Mae’r plant yn cael cyfleoedd gwerthfawr i ymweld â chartrefi preswyl ac ysbytai, gan
ddatblygu empathi, caredigrwydd ac ymdeimlad o berthyn.
Yn ogystal, mae’r cyfleoedd i ddatblygu sgiliau ymarferol megis gwaith coed yn rhoi
profiadau unigryw a chofiadwy i’r plant. Mae’r ymrwymiad i arfer dda yn sicrhau bod
pob plentyn yn cael ei gefnogi i deimlo’n ddiogel, yn hyderus ac yn gallu ffynnu.

Yn derbyn canmoliaeth uchel mae Cylch Meithrin Bro Alun, Wrecsam a Chylch
Meithrin Y Graig, Sir Ddinbych.